Dos gabinetes de ciencias dos institutos históricos, aos clubs de ciencia e o STEMbach

O mércores 11 de Marzo deste ano, o CPPI dos Dices participou nunhas xornadas organizadas polo Consello da Cultura Galega sobre as actividades de ciencia nos centros de ensino de Galiza .Estas xornadas foron coordinadas por D. Javier Méndez Zunzunegui, que foi profesor de tecnoloxía do noso centro por máis dunha ducia de anos e agora profesor do IES Arcebispo Xelmírez II.
Nestas xornadas fomos invitados a participar 6 institutos galegos, para mostrar as  actividades desenvolvidas a través dos respectivos clubs de ciencia .
Foron unhas xornadas intensas, nas cales poidemos aprender das actividades realizadas por outros centros, como a identificación de fármacos neuroprotectores, o estudo da contaminación do río Touro, a fabricación dun satélite no interior dunha lata, así como  demostracións prácticas de diversas experiencias científicas tanto no eido da física como da química.

No noso caso, o alumnado do CPPI dos Dices  (no vídeo do enlace a partires do minuto 39), acompañado polos profesores de ciencias Eva e Javier,  presentou unha escolma dos traballos levados o cabo ao longo deste curso académico, entre os que figuraban os seguintes:
- Fabricación de foguetes de azucre
- Estudo dos microorganismos das fontes e lavadoiros abandoados de Rois
- Proxecto de investigación escolar "Tyto"
- Obtención de cristais a partires dunha disolución de dihidroxenofosfato de amonio
- Fabricación de Slime
- Estudo dos micromoluscos da Praia da Aguieira
- Cría e estudo do desenvolvemento embrionario do peixe cebra (Danio rerio).
A xornada rematou cunha visita as instalacións do museo do Instituto Arcebispo Xelmírez de Santiago.

Club de Ciencia do CPPI dos Dices